每年嘅呢個時候，天氣啱啱涼少少，就係食大閘蟹嘅好時候。大閘蟹外表睇落真係好奇怪，如果唔係試過佢係咩味道，真係唔會貿然咁去挑戰，就連魯迅先生都曾經讚過「第一個吃螃蟹的人是很令人佩服的，不是勇士誰敢去吃它呢？」咁歷史上又係邊位勇士首先挑戰呢？

可能史友會問，雖然有人率先嘗試，但蟹嘅形象始終都幾怪，「食蟹」呢件事又係點樣普及呢？傳說就係話古時紹興有一年蟹嘅數量多到成災，當時一位師爺就諗到將啲蟹放入缸再加入鹽水，結果蟹就全部死晒，而佢自己就當住大家面食咗啲蟹，其他圍觀嘅人見到都跟住食，咁呢個當然係傳言啦。

如果就咁講明確記載，暫時最早發現到嘅就係東漢嘅時候，當時東漢郭憲撰寫過《漢武洞冥記》，入面第三卷就曾經講提到「善苑國嘗貢一蟹，長九尺，有百足四螯，因名百足蟹。煮其殼勝於黃膠，亦謂之螯膠，勝鳳喙之膠也。」當時就明確提到蟹呢種生物嘅外形，甚至仲提到煮埋隻蟹嚟食，蟹膏嘅味道都描述埋，認真識食啊！

而喺《嶺南異物志》入面，亦都有提到「嘗有行海得州渚，林木甚茂，乃維舟登崖，繫於水旁，半炊而林沒於水，其纜忽斷，乃得去，詳視之，大蟹也。」而呢道所指嘅蟹，應該就唔算係大閘蟹，而係海蟹喇！

原圖嚟自網絡