「人血饅頭」係點樣嚟？

「人血饅頭」呢個詞近年就經常被提起，好似最近响區議會會議上疑似同一陣營嘅區議員响會上互相指責，仲話對方食「人血饅頭」。單純咁理解詞意，人血饅頭就係指緊沾有人血嘅饅頭，而暗地嘅意思就係指利用其他人嘅不幸去令自己獲利，但到底呢個詞係點嚟，歷史上又係咪真係有「人血饅頭」呢？

古時嘅民間迷信，相信以人血入藥係可以醫治到疾病，特別係肺癆，呢個風氣去到《本草綱目》編成之前仍然盛行。喺唐朝陳藏器所編嘅《本草拾遺》，入面就有記載，當劊子手處決犯人嘅時候，旁邊觀刑嘅人都會向劊子手買沾有人血嘅饅頭。

而嚟到近代，「人血饅頭」呢個詞係出自魯迅先生嘅短篇小說《藥》，故事以19世紀作為時代背景，描述華家老栓為咗幫個仔醫治癆病而去刑場觀刑，仲買埋「人血饅頭」，但事後小栓並冇好轉，反而病發身亡。自此，「人血饅頭」就多咗一層意思，而魯迅先生呢篇《藥》亦都成為經典，多年嚟成為中學課程嘅指定作品。