上星期波士問咗阿史一個問題，佢話佢會去澳門一日遊，問個度邊間賭場最易贏錢。阿史心諗，知道就唔駛返工啦！
澳門賭業世界聞名，香港股票市場都有唔少澳門賭業股，每年亦有唔少人過大海賭錢。咁到底澳門賭業係幾時開始興起呢？根據澳門博彩監察協調局網站資料，澳門博彩業發展可以追溯到16世紀開埠初期，不過當時澳門博彩業無乜監管，直到1847年，當時嘅澳葡政府首次正式將澳門博彩業合法化。响1937年，澳門博彩業作出一次重大改革，當時澳葡政府頒令將所有博彩業專營權集中，進行統一承投，最後就由傅德榕同高可寧為首嘅「泰興公司」投得。
至於香港人熟悉嘅澳門旅遊娛樂有限公司，就係响1962年註冊。當時由於泰興公司嘅專營權响1961年12月屆滿，葉漢、葉得利、何鴻燊以及霍英東等商人組成嘅新財團同泰興公司競投賭牌，最後新財團獲得經營娛樂場、舖票、山票及白鴿票嘅專營權，呢個財團就係澳娛。