陳皮貴過黃金？

最近阿史去飲喜酒時撞返位中學同學，呢位中學同學係某名食肆嘅太子女，响宴席上同學們吹水時佢就話佢爸爸同啲飲食界朋友之間送禮興送陳皮，仲話依家陳皮貴過黃金，阿史聽到之後都好想買返啲貨。

相信大家都聽過，廣東有三寶，陳皮、老薑、禾稈草。陳皮之所以咁出名，其中一個原因係佢嘅藥效，據《本草綱目》記載：「陳皮：療嘔噦反胃，時吐清水，痰痞咳瘧，大便閉塞，婦人乳癰。入食料，解魚腥毒。好古曰，橘皮以色紅日久者為佳，故曰紅皮、陳皮。」講到廣東嘅陳皮，最出名就應該係新會嘅大紅柑，據史料記載，响元朝初期新會已有人種柑橘，响外海地方僅陳氏一戶就有「甘子田租十石」，而陳皮就係種新會柑而出現嘅一種農產品。

講返轉頭，點解又會有陳皮貴過黃金嘅講法呢？當中就關係陳皮年份愈耐，愈係醇香味濃，據講藥用價值亦愈高。另有老行尊話，老陳皮之所以咁有價值其實仲有一個好現實嘅理由，就係老陳皮保存比較花工夫，特別係响廣東呢啲較為潮濕嘅地區，陳皮保存得唔好就好容易會發霉甚至有蟲蛀，加上陳皮始終係消耗品，所以愈舊嘅陳皮就愈貴喇！