上個星期阿史就同大家講過吓滙豐大班，喺回歸前呢嘅職位可以話係香港權力最大嘅人之一。既然有返咁上下身份，住嘅地方自然唔會差，而講到最出名嘅滙豐大班屋，就要提位於港島太平山區歌賦山普樂道10號嘅空中樓閣天比高。天比高佔地44000平方呎，自1974至1990年間就係滙豐大班嘅專屬府邸，認真巴閉。

被譽為「滙豐神級大班」嘅浦偉士喺返英國之前，以超過八千萬嘅價錢將天比高賣俾八佰伴主席和田一夫。不過，之後和田一夫破產，以3.7億轉手俾明珠興業主席黃坤。點知黃坤遇正97亞洲金融風暴，樓價插水，黃坤自己亦周身債外加官司纏身。成為銀主盤嘅天比高最終以超過3億被影星周星馳購入，佢聯同菱電發展拆開天比高做4個獨立單位出售，周星馳保留其中一個單位自住，一直到依家。

圖為天比高重建後洋房之一，原圖嚟自網絡。