講到發明飛機，好多人第一時間都會諗起美國嘅萊特兄弟，而响佢哋發明飛機5年幾之後，中國亦都有人製造出飛機，呢個人就係馮如。

馮如生於廣東省恩平縣，細細個屋企環境唔好，12歲就跟住喺美國三藩市做生意嘅舅父去美國，一來係因為舅父可憐馮如一家窮困，二來馮如自己都想出去見識新事物。馮如喺三藩市見到美國科技發達，決心鑽研機械科學。馮如就係咁一邊打工賺錢交學費，一邊研究機械製造，幾年過去，佢已經成為小有名氣嘅機器製造家。除咗發明製造出抽水機同打樁機之外，佢設計嘅無線電收發報機由於性能良好而深受用戶歡迎。

1905年，日俄兩國經美國調停後簽訂《樸茨茅斯條約》，俄羅斯將遼東半島嘅特權轉讓日本，對中國嚟講又係一份喪權辱國嘅條約。馮如感到痛心之餘，下定決心製造飛機嚟幫中國對抗外敵。當時萊特兄弟發明咗飛機，引起全球轟動，不過全部資料被封鎖，所以馮如同佢嘅助手差唔多要從零開始，利用自己掌握嘅空氣動力學知識設計圖紙。為咗籌集資金整飛機，馮如變賣自己所有值錢嘅嘢，仲親自游說當地嘅華僑，募集資金。1909年9月，「馮如1號」成功試飛，馮如團隊製作嘅飛機，其首飛紀錄比萊特兄弟嘅仲要遠1788英尺。1911年，馮如拒絕咗多個國家嘅邀請，帶住佢嘅團隊同技術返中國。

可惜，馮如1912年喺廣州試飛新製造出嚟、性能更好嘅飛機嘅時候發生意外，年方29歲就撒手人寰，葬於黃花崗。

圖為馮如同「馮如1號」。網絡圖片