喺22年前今日，發生咗一單轟動全球嘅新聞，就係英國戴安娜王妃突然因為車禍離世，終年36歲，令人惋惜。話說喺1997年8月31日晚上，當時已經同查理斯王子離婚嘅戴安娜，喺法國巴黎同男友多迪法耶茲食完晚飯後搭車離開，期間因為逃避狗仔隊追蹤，座駕以時速245公里奔馳，最終喺隧道發生嚴重車禍，戴安娜、多迪法耶茲以及司機保羅死亡，只有保鑣瓊斯生還。喺1999年，法國當局完成調查，指車禍原因係保羅受酒精同處方藥物影響，開車太快。而英國响2008年就話戴安娜王妃係「不合法被殺」，並歸咎於狗仔隊同保羅。至於車禍唯一生還者瓊斯，多年來一直都保持低調，甚至話自己「失憶」唔肯回應事件，於是就出現唔少「王室暗殺」嘅陰謀論。

不過當年曾經為戴安娜王妃解剖檢驗嘅英國頂尖法醫病理學醫生謝潑德早前出書，提到呢宗車禍，佢就話如果當時戴安娜王妃有纜安全帶嘅話，應該保得住條命。佢又話戴安娜王妃肺部一條靜脈撕裂係致命傷，如果當時撞向前座嘅時候角度斜少少，或者早啲送上救護車，戴安娜王妃亦都有機會生還。

圖片為巴黎車禍現場、戴安娜王妃訪港，取自網絡。