宜家出街飲杯凍嘢，通常都係冰多過啲嘢飲，多到好似唔使錢咁款。其實香港嘅冰以前係好珍貴㗎，一啲都唔平。由於香港嘅地理位置無辦法形成天然冰，所以喺開埠之初，需要靠進口天然冰嚟作醫療用途。當時只得中區嘅「雪廠」——丟杜公司冰庫先有天然冰供應。而呢個冰庫所在，就係宜家嘅雪廠街同相鄰地區。

1843年，香港啱啱開埠無耐，唔少英軍適應唔到香港嘅天氣，得咗熱症，需要用冰敷嚟降溫。但係香港同鄰近地區都無冰塊供應，導致好多士兵病死，亦有士兵怕得熱症，因而唔肯嚟香港甚至逃亡。丟杜公司見到運冰嚟香港有利可圖，就要求香港撥地起冰窖，佢哋負責由美國運冰嚟香港銷售。港府為咗有冰供應，梗係應承喇，將一塊鄰近兵營同海旁嘅土地撥出嚟做冰庫，呢個冰庫就係雪廠街嘅「雪廠」喇。   

由於當時只得丟杜公司可以供應冰塊，冰嘅價格一直高企。據書籍記載，1847年嗰陣一磅冰賣成三分六厘白銀，可謂係貴價貨，普通人家真係買唔起，除咗政府之外，多數買家都係外國人或者酒吧。

原圖嚟自網絡。