尋日同大家講咗港島雪廠街嘅歷史，提到以前嘅天然冰係貴價貨，喺香港只有丟杜公司供應天然冰。但係天然冰始終受天氣所限，唔能夠源源不斷咁供應，所以好快出現咗人造冰。一個英國商人凱爾知道人造冰嘅製作方法之後，嚟香港集資開廠，同丟杜公司爭奪香港嘅冰塊供應市場，仲掀起一場減價戰添。

 凱爾嘅人造冰工廠最初設喺灣仔春園街海旁，喺丟杜公司嘅天然冰由於遠東地區需求增加而供應不足嘅時候，凱爾乘勢推出人造冰，主打唔受天氣影響、乾淨衛生。初時人造冰同天然冰嘅價錢都係三分六厘白銀，但面對丟杜公司有大量天然冰提供、有好多老客戶嘅競爭底下，凱爾唯有將人造冰減價出售，以吸引客戶。丟杜公司為咗留住舊客戶，亦都被逼減價迎戰。

 不過，人造冰工廠勝在有英資財團怡和洋行支持，喺銅鑼灣海旁開設新冰廠，大量製造人造冰，成本亦較低，令丟杜嘅天然冰已經無辦法與之競爭。凱爾後嚟喺怡和嘅注資下，將丟杜嘅冰庫買落嚟，正式入主雪廠街嘅雪廠，經營人造冰生意。

原圖嚟自網絡。