新界五大氏族係邊五個？

呢排阿史同大家講唔少新界嘅古屋古廟，而呢啲歷史建築好多時侯都係由當地嘅一啲氏族集資興建。成日都聽到嘅「新界五大氏族」，到底係指緊邊五個呢？

所謂嘅「新界五大氏族」，其實指緊喺宋明年間或者清朝之前就已經移居到新界嘅族群，而每個同一姓氏嘅族群都會喺自己嘅居住地建立圍村、廟宇、祠堂等等嘅建築，同時亦都會建立墟市同埋開辟交通要道，所以就被理解成一個大族。

「五大氏族」喺新界真係擁有唔少土地，所以唔單止係人多，連地都多。一直講緊嘅「五大氏族」第一位就係由江西吉安最早嚟到新界定居嘅錦田鄧氏，佢哋一直都被認為係新界五大族之首。而第二大氏族就係新田嘅文氏，相傳佢地嘅先祖係文天祥嘅堂細佬文天瑞，因為南宋末年逃避元兵而嚟廣東一帶。至於第三位就係嚟自福建永定嘅上水廖氏、第四大氏族廣東番禺嘅上水侯氏，而第五個氏族就係原籍江西宜春嘅粉嶺彭氏。五大氏族當然有唔少故仔可以講，阿史有機會就同大家詳細介紹。