「丁戊奇荒」 東華醫院有份籌款賑濟？

早幾日阿史就講到藍屋嘅前身係華陀廟，佢嘅出現仲早過東華醫院。有睇開史檔嘅史友都應該有睇過關於東華醫院嘅文章，咁阿史就唔再重覆講喇，反而今次就想講一場發生喺光緒年間嘅華北大旱災，呢次嘅災害入面，東華醫院都出過唔少力。

丁戊奇荒發生喺清朝光緒元年至四年（1875年-1878年）嘅華北地區，係一場極為罕見嘅大型饑荒，當中就以1877年（丁丑年）同埋1878年（戊寅年）最為嚴重，外國學者叫呢場饑荒做「1877-1878年大饑荒」，甚至仲認為係同聖嬰-南方震盪現象改變咗氣候有關。丁戊奇荒所涉及嘅地區由山西、陝西、去到河南、山東等地，當時嘅受災人口達到1億幾人，仲有成千萬人餓死。亦都因為呢場饑荒，對晚清帶嚟重大嘅影響，有清朝嘅官員就直頭形容「此千古奇災，是鐵石心腸亦當淚下」。

咁呢場災害又同東華醫院有咩關係呢？原來喺得知華北旱災後，東華醫院就發起賑濟籌款，喺香港同埋東南亞一共籌到16萬，當時嚟講並唔係一個細數目。而喺災害完結之後，東華醫院籌款賑濟有功，1879年就獲得光緒皇帝御賜「神威普佑」牌匾。