又嚟到公共屋邨系列，繼上次同史友們講完住客都唔捨得搬走嘅北角邨之後，阿史今次就想講下呢個被稱為「平民豪宅」嘅華富邨。

華富邨應該都算得上係香港最出名嘅公共屋邨之一，事關如果運氣好的話，有機會抽得中見到海景嘅單位。位於南區嘅華富邨一共分成五期落成，最早嘅一期就係1967年落成，而後來加建嘅華翠及華景樓就係1978年落成。全盛時期嘅華富邨一共住咗50,000人，近年嘅統計就話有27,000人左右。

雖然今時今日係叫做「平民豪宅」，但華富邨最初落成果陣並冇太多人申請，最簡單嘅原因係因為呢度位置偏僻，交通非常不便，搞到當時政府要專登拍宣傳片介紹呢個地方。歷年嚟都傳出唔少華富邨重建計劃，但由於華富邨整體結構仍然安全，再加上難以安置受到重建影響嘅居民，所以房屋委員會話短期內都唔會進行重建。