上次介紹中緬邊境嘅野人山時,阿史就提及抗戰時中國遠征軍响野人山嘅慘事,今次就想同史友們講講呢段悲慘歷史。

1942年,日本入侵緬甸,當時英國要中國派兵共抗日軍,於是國民政府就組建中國遠征軍,幫助英軍協防緬甸。但後嚟駐緬英軍無力抵抗日軍,最終中國遠征軍撤退返國。但由於撤退之路被日軍切斷咗,所以大部分遠征軍戰士响第5軍軍長杜聿明帶領下,被迫走入野人山,準備繞道回國。

點知,野人山呢個地方係一個極恐怖嘅地方,猛獸成群,螞蟥遍地,撤退士兵要忍受住惡劣環境、疾病、飢餓以及日軍嘅追擊不斷前進,結果好多士兵頂唔順而命喪野人山。據杜聿明回憶錄記載,走入野人山包括咗第五軍部分軍直部隊、新22師、第96師部隊,夾埋大約2萬人,結果剩返幾千人生存到。

對於杜聿明點解會要求軍隊從野人山返國,唔少人認為係因為蔣介石兩次電令杜聿明,命令遠征軍「未奉命不得入印」,作為黃埔嫡系嘅杜聿明自然唔敢違反蔣介石嘅命令,結果導致中國遠征軍魂斷野人山。

原圖嚟自網絡