提到九龍十三鄉呢個統稱，相信史友們都會記得阿史曾經介紹過，至於十三鄉入面具體嘅村落，唔知史友們又知唔知呢？十三鄉之中，曾經有一條大磡村，但就因為一件事而被日軍夷為平地。

大磡村位於九龍鑽石山與新蒲崗之間，早年仲係一個市區大型寮屋區，係鑽石山寮屋區之一。居住喺大磡村嘅人大多都係姓朱，據考古證據推斷，呢條村落喺兩宋期間就已經有人居住，而點解會以姓朱嘅人為主，估計係朱氏祖先朱居元乾隆年間帶同夫人及8名兒子遷居新安縣九龍沙挖埔，後來其中一個仔就買落鑽石山一帶田地立村建祠，養豬種田，形成大磡村。

而呢條村落去到二戰之前都有一定規模，但點知日軍侵佔香港期間就被夷為平地。當時，日軍打算擴建啟德機場，喺機場附近考察完一輪發現大磡村係一個唔錯嘅位置，於是就清拆村落，大磡村全村連同朱氏宗祠被夷為平地。雖然日軍投降之後係可以復員，但由於全村盡毀，朱氏未能夠喺原址重建家園。

隨住上世紀50年代，香港工業興起再加上難民潮，令到唔少難民搭建寮屋居住，部分難民喺鑽石山搭建寮屋暫時棲身，形成密密麻麻寮屋區，被稱為大磡村寮屋區其實已經唔係舊址喇！而呢個寮屋區亦都喺1998年宣佈清拆，於2001年完成8期工程。

原圖嚟自網絡