記載香港歷史嘅重要文獻 《新安縣志》

喺研究香港歷史嘅時侯，特別係開埠前嘅歷史，都有一本好重要嘅地方志需要用到，阿史想介紹嘅呢本就係《新安縣志》。

《新安縣志》係廣東省新安縣嘅一本地方志，目前存世嘅就有兩個版本嘅《新安縣志》，分別係清朝康熙二十七年年間嘅舊志以及清代嘉慶二十四年嘅新志，當中康熙版嘅舊志就分成13卷分別有輿圖志、天文志、地理志、職官志等等；至於嘉慶年間嘅就係由王崇熙編著，分成24卷記錄人口、氣候、山川、物產，天災等內容，就連名勝古蹟、勇士孝子、奇人異士都喺書入面搵到。喺呢本地方志仲可以搵到早期香港嘅地形以及唔少古老地名就好似「九龍汛」、「大奚山」、「塔門」、「鯉魚門」等等。

咁有史友可能會問，講咁耐到底新安係邊度？其實喺明朝萬曆元年，喺東莞縣南部就分拆咗一個新嘅縣，呢個就係新安縣。原本呢個地方只係東莞縣一部分，但因為人口增加，而且為防治海盜而選擇分拆出嚟管理，當時人口就只有33,971人。咁具體範圍到底係邊度呢？就係「自東莞縣轄地南端海岸線起，向北劃出56里範圍」，即係一半土地係今日香港，另一半係深圳。