喺九龍嘅西面，就有一個曾經嘅島嶼，現時經過填海已經同陸地連接。呢個島嶼由高空望落有個好大嘅特色，就係成個形狀望落好似一隻翻轉嘅船，所以就被稱為昂船洲。

關於昂船洲嘅記載早喺清朝嘉慶年間嘅《新安縣誌》就有寫到，當時係將昂船洲寫做仰船洲，只係去到中英《北京條約》附圖入面，就將呢個地方寫咗做盎船洲，所以單單係呢個島嶼就已經有三個唔同嘅寫法。

咁到底呢個清朝就開始有記錄嘅地方又係從事過乜野行業呢？據相關嘅記載，呢道最初係用嚟開始礦石，後來就改建成昂船洲海軍基地。去到1860年代，由此中央監獄太過擠迫，當時港府就決定要喺島上興建一座昂船洲監獄以作舒緩，點知又遇上甲戌風災令到囚犯死傷嚴重。而喺日佔時期，昂船洲亦都成為日軍攻佔嘅地方，作為軍事用途無線電接收基地，仲將呢度叫做「向島」。喺二戰結束後，昂船洲就被用作隸屬工務司署嘅炸藥庫。

現時嘅昂船洲經歷過90年代嘅大規模填海之後，就已經同新九龍連接，一個島嶼之上就有幾種唔同用途：既有八號貨櫃碼頭、昂船洲政府船塢、昂船洲污水處理廠等公共設施都設立喺入面，就連解放軍駐香港部隊軍營都係喺呢度。

唔講唔知，其實昂船洲原本係屬於深水埗區，只係後來因為葵涌貨櫃碼頭向南擴區，就造成今日有部分地方係屬於葵青區。

原圖嚟自網絡