比商朝甲骨文更早嘅陶文?

如果提到中國古代早期嘅文字，相信唔少史友都會第一時間諗起甲骨文，但其實比甲骨文流傳更加早嘅時代，中國古代仲有一種文字，叫做陶文。

按照目前嘅考古發現同埋研究，目前發現到嘅甲骨文有四千幾個，識別到出嚟嘅就有二千八百幾個，所以唔少學者都視甲骨文做最早嘅文字。咁陶文又係點呢？顧名思義，陶文就係被刻劃喺陶器之上嘅文字，有丁工陶文、高郵陶文、半坡陶文等幾種，都係用發掘地而命名，當中最早嘅半坡陶文仲被推斷係公元前4300年到公元前4800年，但係問題就係呢種喺陶器之上嘅「文字」目前發現數目唔算多，半坡陶文亦都只係得三十個，而且唔同地方嘅陶文似乎都有唔同，令到學者都好難辨識得到。

目前學者認為陶文主要有兩種，一種就係識別唔到嘅「原始文字」，而另一種就係「標記」，同樣都係唔知有咩意思，只係根據後來戰國嘅陶器推斷有可能係人名或者官名等等。於是，雖然陶文出土同埋歷史都比甲骨文早一段時間，但就因為以上種種原因令到佢仲未被視為係一種文字。