尋日同史友們介紹到杜勒斯嘅時候，就提到佢曾經聯同佢果位中情局做局長嘅細佬一齊策動阿馬斯從宏都拉斯入侵瓜地馬拉，控制各個香蕉共和國。咁到底香蕉共和國係乜嘢國家，點解又會咁樣命名呢？

「香蕉共和國」並唔係指緊果啲出產香蕉嘅國家，呢個詞出自1904年美國作家歐·亨利小說《白菜與國王》，係一個政治同埋經濟體系嘅貶義詞，特別係指緊果啲國內廣泛貪污並且有外國勢力支持同介入嘅國家。喺小說入面，呢個詞就被用嚟影射美國控制下嘅洪都拉斯。至於點解叫做「香蕉共和國」，原因就係因為呢類型嘅國家唔少都係依賴出口香蕉、可可、咖啡呢類嘅經濟作物。亦即係被認為係裙帶資本主義。

咁講咁耐到底有冇乜野實際案例，咁就當然可以講返杜勒斯同埋佢細佬啦！喺1950年代，身為聯合果品公司嘅紐約法律事務所股東美國國務卿約翰·杜勒斯就聯同佢曾任聯合果品公司股東嘅中情局局長艾倫·杜勒斯，發動自洪都拉斯入侵危地馬拉。據講佢哋策動呢場入侵嘅原因，係因為呢位總統阿本斯喺1951年將聯合果品公司喺危地馬拉25萬英畝閒置土地收歸國有後分發予貧民，引起呢間公司不滿並且指控呢個國家同蘇聯有關，呢個指控喺冷戰時候有極大威力。最後令到第一位民選總統阿本斯政權倒台，並且令到一個獨裁政府產生，三十年嚟令到20幾萬人死亡。

原圖嚟自網絡