呢幾日阿史就睇到張舊相，相入面係一艘1930年代去到1970年代世上最大嘅郵輪，本來真係未必同香港有關係，但呢艘船就因為一場火災最終就葬身喺香港嘅海域之中，呢艘就係伊利莎白皇后號郵輪。

皇家郵輪伊利莎白皇后號喺1938年9月27日建成，最初係一艘以伊利沙伯命名嘅遠洋客輪，負責每周由英國修咸頓出發，經法國前往美國紐約嘅航程。伊利莎白皇后號最巴閉嘅地方就係由建成之後嘅56年為止，佢都係世上最大嘅客輪，全長1,031英尺，排水量達83,600噸，難怪去到1940年就被用作運兵船用途，直到1946年先恢復原來用途。

咁好地地一艘英國客輪又同香港有咩關係呢？原來喺1971年，就有一位香港船商董浩雲，以320萬美元高價買入呢艘郵輪，並且用1,200萬港元改建成流動嘅大學，成個計劃仲好誇張咁叫做「宇宙學府」計劃。但點知去到呢艘船就嚟完成改裝果陣，就突然喺青衣島同埋昂船洲之間被縱火並且完全焚毀。

雖然當時消防處就已經派出當時最大嘅葛量洪號同埋幾架消防船出動，但火勢好快就升到去四級，船身接近八成已經完全焚燬，船身仲45度傾斜喺海面。呢次火災足足燒咗24個鐘，並且令到14人受傷，係香港史上唯一一場「災難級大火」。

原圖嚟自網絡