尋日就係第七批參與抗美援朝戰役在韓中國志願軍烈士遺骸歸國嘅日子，朝鮮半島喺1910年起被日本佔領統治，直到1945年二戰結束之後，南北韓鮮就分別組成咗兩個政府，並且各自都宣稱自己係朝鮮半島唯一合法政府，拒絕承認以北緯38度線劃分嘅蘇美對日受降分界線為邊界，於是1950年6月25日至1953年7月27日就爆發咗韓戰。

呢場戰爭有幾咁慘烈，雙方軍隊傷亡有幾咁慘重，相信唔使阿史再講大家都會知道，但係唔講唔知，原來韓戰嘅爆發係拯救咗一個國家，呢個國家就係日本喇！韓戰爆發前後，當時日本經歷二戰之後國內遍地焦土、處於「經濟蕭條的邊緣」，但韓戰嘅爆發令到當時美軍需要喺橫濱附近設立一個機構提供大量前線所需要嘅被服、軍用毛毯、作戰沙袋、各種鋼材等軍需物資。

當時嘅日本首相吉田茂認為，韓戰對日本而言就係「天佑神助」，單係1950年至1952年底，美軍就同日本採購達10億美元軍需物資，令到當時日本工業成功復活。而去到1952年，由於日本提供軍需物品有功，美軍就更加容許日本企業生產兵器、彈藥、修理車輛、飛機，令到日本重工業都得以恢復，呢類嘅工業據估計又為日本帶嚟36億美元，仲未計當中所得到嘅技術。

原圖嚟自網絡