「兩彈一星」係點嚟？

幾日前阿史就同大家介紹咗完成咗中國45次核試驗、有「大漠將軍」之稱嘅林俊德、亦都同史友們介紹過「中國氫彈之父」于敏。咁有史友就問，到底「兩彈一星」係點嚟，又係邊「兩彈」同「一星」呢？

所謂「兩彈一星」，官方講法就係指核彈（原子彈同氫彈）、導彈以及人造衛星。呢個計劃係由當時嘅國務院總理周恩來作為主要負責人，喺佢主持之下，1956年就由國務院頒發《1956-1967年科學技術發展遠景規劃綱要》，並且搵嚟一批留學海外已經歸國嘅科研工作者好似錢學森、鄧稼先、錢三強等，有齊計劃同埋人員之後，就開展咗「兩彈一星」研究。

成個「兩彈一星」計劃喺上世紀50年代尾先提出，但去到1964年10月16日，中國第一個原子彈596原子彈喺羅布泊成功爆炸，令到中國成為世上第五個擁有核武嘅國家；而跟住幾樣發明好似1966年地對地飛彈、1967年第一枚氫彈同埋1970年第一顆人造衛星都相繼完成，標誌住中國科技發展嘅進程。