錢塘江大潮

每年農曆八月份，大概喺中秋節前後幾日，喺錢塘江都會有一個自然現象發生，就係錢塘江大潮。簡簡單單一個自然現象，到底點解可以令到數以十幾萬嘅國內國外民眾爭相去睇呢？

「觀潮」呢件事並唔係近代先出現，早喺宋朝就已經開始流行，農曆八月十就被定為「潮誕」，呢一日相傳會係朝廷檢閱水師、民眾傾城觀潮嘅日子；去到明朝，海寧鹽官更加係當時嘅觀潮勝地，慢慢仲發展出八堡、鹽官、老鹽倉三個觀潮點。

要知道錢塘江大潮係被譽為「天下第一潮」，屬於秋潮嘅鐵塘江大潮由於發生嘅地方正係杭州灣，呢個入海口外寬內窄，成個喇叭咁嘅形狀，最外側蘆潮港至外游山連線河口寬度就有98.5千米，去到澉浦一帶就收窄到19.4千米。因為呢種地形關係，令到潮水水位短時間之內迅速變化；再加上中秋前後、地球、月亮、太陽排列近乎直線，海水受到引潮力最大，於是就引發到呢種海寧鹽官「一線潮」。而今年嘅「一線潮」更加因為梅雨季、新安江水庫洩洪而成為近三年最大嘅一次！