太極拳吳公儀VS 白鶴拳陳克夫

每隔一排，網絡上都會重新流傳一段影片，呢段影片相信唔少史友都曾經重複睇過，事關「吳陳大戰」當年真係轟動成港澳同埋海外各界！

呢場發生喺1954年嘅大戰兩位主角分別喺嚟自香港嘅太極拳宗師吳公儀同埋澳門白鶴拳宗師陳克夫，兩位師傅都係有返咁上下來頭。吳公儀就曾經喺黃埔軍校做過教官，自稱係「自北方走到南方，未逢敵手」，而見到呢番說話陳克夫當然就相當不滿，於是就引發咗港澳報章長達半年口誅筆伐，亦都因為咁而令到兩人最後決定真係嚟一場比武。但呢場比武並唔係無意義，比武嘅27萬收益最後係會幫助石硤尾木屋區大火災民。

咁呢場比武到底有幾轟動呢？由於當時嘅香港法例係唔允許公開比武，於是擂台賽就喺澳門新花園酒店進行。成場比武分成六個回合，每個回合5分鐘，並且有好多規定、好多招式都唔用得。喺比武之前，成個社會都相當關注呢件事，仲講到好似武林間嘅決鬥咁。當年香港就有5,000幾人搭船去澳門睇呢場比賽。但結果就係，比賽一開始，吳公儀嘴角首先掛紅，繼而陳克夫鼻中拳血流不止；再次開戰之後，吳公儀打中陳克夫前臂，而陳克夫又高踢，兩人差啲動真火，結果經商議判雙方「不勝不敗不和」。