由老人、婦女築成嘅滇緬公路

尋日就同史友們講到，喺抗日戰爭期間，盟軍為咗可以打通中印公路而發動咗一場滇西緬北戰役去確保援華物資可以穩定供應，咁可能有人會問，滇緬公路又係點啊？1942年，其實日軍就已經攻陷咗緬甸，仲準備進攻滇西，喺呢個時候滇緬公路已經落入日軍手中，呢條咁重要嘅陸路國際交通大動脈就被截斷咗。

其實喺1937年果陣，抗日戰爭爆發之後日軍就好快佔領咗華北、華東、華南地區，當時中國已經冇乜港口轉運嘅途徑，當時就諗到要興建一條後方嘅國際通道。於是，當時國民政府就進行「修改滇緬公路的計劃」。

滇緬公路，舊稱昆畹公路，全長1,453公里由雲南昆明連接到緬甸臘戍，喺1938年春天開始興建，並且喺同年12月建成通車，速度真係快得驚人。唔講大家真係未必知，其實喺1937年中國就曾經向國際招標工程，雖然有幾間大公司都表示有興趣，但就要用上六、七年時間。咁樣嘅情況之下，中方決定自行修建公路，當時並冇一啲專業技術人員，除咗有一啲逃避戰禍嘅無業知識青年外，興建公路最主要嘅人就係20萬各族勞工，以老人、小朋友同埋婦女為主，喺缺乏機械嘅情況下親手修建公路，不足一年建成，成件事真係可歌可泣。