建國初期掃盲運動令幾多人學文識字？

呢排阿史就同大家介紹咗近代唔少高科技嘅發明，即係好似「北斗導航衛星系統」、「兩彈一星」等等，唔少史友睇完都好慨嘆，就係短短幾十年時間中國就已經可以由零開始掌握到呢啲高科技。今次阿史就想回歸到根本，講一講建國初期嘅掃盲運動點樣令廣大人民學文識字。

要知道其實喺建國之前嘅幾十年，由辛亥革命、軍閥割據再去到抗日戰爭等等，連住幾十年個社會都係動盪不安，教育普及長期得唔到落實。據建國初年嘅統計，全國5億幾人口竟然係有成四億人都係文盲，當中絕大部分都係工農婦女，即使喺當時中國最大嘅城市上海，青年嘅文盲率都高達八成，情況相當嚴重。

於是喺1945年嘅第七次全國代表大會上，毛澤東就提出要「掃盲」，並且隨即喺各個解放區展開工作，特別係冬季農閒時節都組織咗唔少農民讀書、識字，所以呢個現象又叫做「冬學」；而喺工廠同埋社區亦都有舉行識字班，全國各地推出「識字課本」等等。據統計掃盲運動持續到1964年第二次全國人口普查嘅時候，15歲以上人口文盲率就已經由1949年嘅80%下降到52%，即係足足有一億幾人「脫盲」，成效真係十足！