今年係日本福島核災難十周年，最近呢個地方又再次引起極大爭議。事關日本政府內閣通過將福島第一核電站內大量受放射性物質污染廢水排放入海，呢個決定引嚟亞洲各國同地區強烈不滿，直指係人類一場環境大災難。

咁點解福島第一核電站會有咁多受放射性物質污染嘅廢水呢？呢個就要由2011年東日本大地震講起。2011年3月11日，日本東部近海發生黎克特制9級地震，引發巨大海嘯，日本東北沿海地方受到嚴重破壞。其中位於福島縣嘅福島第一核電廠因地震出現故障，1至3號機相繼發生爐心熔毀，1、3、4號機更發生氫氣爆炸，核反應堆受到破壞，結果泄漏大量放射性物質。為咗避免再次發生核事故，日本當局就不斷向反應堆注入冷水冷卻反應堆，呢個就核污水出現嘅原因。

响2015年日本東京電力公司就開始放風研究將核污水排入大海嘅可行性，但每次都引起日本國內外強烈反應，好似2020年日本政府提出核污水排出大海計劃，不過就因反對聲音太多而擱置。

原圖：網絡