溥儀「末代皇弟」低調執教鞭

滿清末代皇帝溥儀嘅生平相信史友們都應該好熟悉，包括佢啲家族八卦事。咁史友們又有無聽過，溥儀有個細佬低調咁留响北京告老呢？

溥儀生前有三個皇弟，四弟溥倛早逝，為人最熟悉就係溥傑，至於今次介紹嘅就係佢三弟溥任。溥任出身於1918年，當時滿清已經亡咗，所以佢只可以算係一個過氣皇弟。按規定，愛新覺羅家族成員响辛亥革命後就要全都改姓，「金」係其中一個，所以佢另一個名叫金友之。

後嚟响三十年代，溥儀成為偽滿州國皇帝，但佢就無跟隨哥哥去東北，繼續留响京城。到咗1947年，佢响父親醇親王載灃支持下，就將後海嘅舊宅開辦北京競業小學，並自任校長，父親就任董事長，妹妹當老師。响五十年代就將所有財產捐晒俾國家，佢就教書教到1988年退休。退休後佢就研究清史，仲發表咗《晚清皇子生活與讀書習武》、《醇親王府回憶》，同整理咗父親載灃《使德日記》，成為研究晚清皇族歷史嘅重要資料。而呢位「末代皇弟」就响2015年離世，終年96歲。