90後畫家手繪「核酸檢測上河圖」

呢排廣東省疫情再起，多地都出現本土病例，令到多區都嚴陣以待，再次進行大規模核酸檢測同埋封城等等嘅措施。喺呢個萬眾一心抗疫嘅時候，喺網絡上都有唔少有心人用盡方法為廣東省打氣，就好似近排就有一位90後畫家另類「二創」清明上河圖。

據內地傳媒報導，呢位畫家係佛山90後嘅男子陳志杰，佢喺當地完成咗核酸檢測之後，就特登喺現場留意咗一陣先至返屋企。喺之後嘅五日入面，佢就將自己腦海入面嘅景色連同「清明上河圖」結合，繪製出呢幅「核酸檢測上河圖」，向前線醫護人員致敬。

陳志杰呢一幅古風山水畫如果大家細心留意，係會睇得出成個景象正正就係佛山禪城、南海兩區開展核酸檢測嘅場景，而喺畫作當中就有345位角色，身穿白色防護服嘅醫護人員就有136名，同場仲有保安、清點物資嘅志願者，排隊等待檢測嘅市民。呢幅咁另類嘅畫作，都真係幾令人印象深刻。