喺今屆東京奧運入面，香港奧運代表隊嘅成員大爆發，喺唔同項目都拎到獎項，係歷來獎牌最多嘅一屆奧運會。喺呢班健兒當中，呢幾日討論度最高嘅一位自然就係有「牛下女車神」之稱嘅李慧詩，事關係佢以34歲之齡喺奧運當中拎到一面銅牌，難度真係相當高。不過講開又講，點解佢會有「牛下女車神」呢個稱號呢？

李慧詩畢業牛頭角下邨柏德學校，係香港第四位獲取「彩虹戰衣」嘅車手，同時亦都係香港第一位可以喺分別兩屆奧運會獲得獎牌嘅運動員，所以佢又被稱為「牛下女車神」。望見李慧詩嘅成就，大家可能會覺得佢好有天份，但唔講唔知原來佢自幼就患有貧血，每次進行完高強度訓練之後都需要好長嘅時間恢復。唔講唔知，其實李慧詩最早並唔係練習單車先，而係因為有超強嘅爆發力，最初係被田徑老師選入田徑隊；去到中學三年班，學校推薦佢參加「明日之星」計劃，當時佢先開始獲得香港自由車聯會挑選參與運動員訓練，並且喺2004年決定展開職業生涯。

而且喺過去嘅比賽入面，佢就曾經手腕骨裂經過幾次手術都好唔返，最後都係全憑自己嘅意志繼續堅持。喺2010年、2011年，李慧詩就分別代表港隊喺亞運、亞錦賽拎到金牌，並且喺2012年奧運拎到銅牌同埋世界盃冠軍、2013年拎到自己第一件彩虹戰衣，成績真係超晒班。之不過，果幾年狀態大勇嘅佢未能喺2016年奧運拎到獎牌，甚至喺2017年佢仲宣佈過唔會再參加任何比賽，但佢最後都決定為夢想堅持，先係喺2018年亞洲運動會出戰取得佳績，再喺之後20個月爭先賽上未嘗敗績。

一位為咗自己夢想一直堅持嘅選手，突破咗年齡嘅障礙，最終以34歲之齡喺奧運當中拎到一面銅牌，佢就係「牛下女車神」李慧詩喇！

原圖嚟自網絡