南海休漁有爭議？

呢幾日阿史响網上見到有人晒啲海鮮相出嚟，點解冇啦啦又會晒海鮮呢？網民就話呢排啲海鮮格價回落唔少，花啲錢就有好嘢食。點解會咁呢？就係因為南海休漁期响八月中結束，好多漁船可以出海打魚喇！

南海休漁期呢個措施，大家又記唔記得幾時開始呢？就係1999年喇！內地當局响1999年起每年會响南中國海實施休漁期，目的係保育漁業資源。休漁期最初係响六月開始，為期兩個月，期間使用拖網同圍網捕魚嘅漁船一律禁止响北緯12度以北嘅南海海域作業。之後措施進一步收緊，休漁期時間長咗，好似2017年起休漁期就有三個半月。

休漁期間，南海嘅海洋生態得以恢復，令啲魚唔會因為過度捕捉而絕種，但南海休漁都帶嚟唔少爭議。南中國海雖然係中國領海範圍內，但唔少海域都存在同其他國家領海範圍嘅爭議，而呢啲國家漁船就唔理休漁期照舊响南海範圍捉漁。另一方面，漁民成兩個幾三個月無得出海捉魚，收入自然大受影響。以往就有唔少香港漁民頂唔住每年呢段無收入嘅日子，索性賣船唔再捉魚。所以話，好多事都係有辣有唔辣。