提起國慶期間最盛大嘅慶祝活動，相信唔少史友都會第一時間諗起係天安門廣場嘅閱兵儀式，之不過原來閱兵儀式並唔係必然會舉行，甚至過去有十幾年都完全冇舉行過，到底當中有咩原因呢？阿史今次就同大家介紹下啦！
尋日就同史友們講到中央人民政府委員會第四次會議接受全國政協建議，正式通過《關於中華人民共和國國慶日的決議》，決定每年嘅十月一日就係中華人民共和國國慶日，而喺早年國慶日其實除咗會有大型慶典活動，仲會舉行閱兵儀式架！
翻查返早年嘅歷史，自新中國成立以嚟就曾經喺國慶日舉行咗15次閱兵，單係1949年至1959年間就舉行咗11次。問題嚟喇，點解好地地舉行咗十一年，閱兵儀式又會取消呢？原來1960年9月，中共中央、國務院本著勤儉建國方針，決定改革國慶制度，所以由1960年至1970年嘅國慶日，天安門前都未有舉行閱兵。時間去到1984年國慶35週年，閱兵儀式先至重新恢復，但講到下一次嘅閱兵其實就已經係去到1999年國慶50週年，而呢次亦都被譽為20世紀舉行嘅最盛大國慶慶典，至於嚟到21世紀，就有2009年國慶60週年、2019年國慶70週年嘅閱兵儀式，唔知史友們又記唔記得呢？
原圖嚟自網絡