喺歷史上嘅唔同朝代，如果講到一份真正嘅「鐵飯碗」職業，相信唔少史友第一時間都會諗到要做公務員，咁到底喺邊個朝代做公務員最著數呢？阿史就會即時諗起宋朝喇！

喺宋朝，特別係北宋時期，當時嘅官員薪俸真係多到你唔信！要了解當時官員嘅薪俸有幾豐厚，就要由當時百姓收入開始了解。當時一個宋朝百姓一個月收入大概就喺三貫左右，簡單嚟講就只夠日常開支。而假如大家咁好彩可以做到州縣低級嘅官員，薪俸基本上就可以達到五貫去到十五貫，另外仲會有祿粟五至十石再加上部分職田，所以生活都算富足。假如可以做到職位大啲嘅地方官好似「知縣」，薪俸基本上就可以達到四、五十貫，另外仲有會絹綾若干，僕人衣糧等補助；而「知州」以及部分中央官員其他福利都係向上調，而且仲可以拎到一百貫到兩百貫薪俸，真係相當和味。

講到最巴閉，一定係做宰相，薪俸足足達到三百貫，仲有祿粟、茶酒廚料、薪炭、鹽、隨從衣糧、馬匹芻粟、等不同補貼，月入三十萬真係唔係夢！

原圖嚟自網絡