尋日就同史友們講到明朝開國皇帝朱元璋為咗防止皇子、王爺會對江山造成危害，所以就諗咗個藩王分封制，明朝嘅王爺只能夠三年入一次京城，並且私底下不得聯繫，但無奈地仍然都係發生王爺造反奪取皇位嘅事。而去到清朝，皇帝同樣都係意識到「王爺」會係一種威脅，所以又諗咗一個方法出嚟限制佢哋。
自從清朝入主中原之後，對於呢啲藩王宗室應該點樣對待真係諗到頭都大埋，事關佢哋既係自己嘅家人，大多數都立過下汗馬功勞，唔可能唔畀權力佢哋；但如畀將國家嘅權力同土地分封出去，又好有機會好似明朝一樣，相當危險！
於是，清政府就用到一招，就係將「王爺」呢個身份變成一個爵位，亦即係既冇權力、又冇軍力，而且仲唔可以離開京城。表面睇嚟「王爺」都仲係好巴閉，但原來呢種制度下，「王爺」係屬於降襲制度，每一代人去繼承呢個爵位之時都會降級，直到變為平民為止。咁所以，其實就係一招巧妙嘅方法，唔傷人命但就可以慢慢清除呢班藩王宗室。
雖然表面上睇嚟，呢種方法可以杜絕擁兵自重嘅問題，但其實咁多王爺留喺京城，自然就會同朝中大臣勾結，形成派系，所以「九子奪嫡」依然都係有發生！
原圖嚟自網絡