今日係中秋佳節，史友們自然都會食下月餅咁樣。講到食月餅，唔少人都會諗起朱元璋响中秋起義打元兵嘅故事。咁史友們又有無諗過，呢個故事有幾多成係真，有幾多成係假呢？
個故事大概係話當時漢人被元人欺壓得太勁，於是朱元璋一幫人就想起兵抗元，咁啱臨近中秋，於是就將造反紙條放入漢人過中秋時必備嘅月餅當中，結果家家戶戶都收到秘條，於是八月十五起事就成功咗。不過，睇返《明史》內容，好似就無提及過呢個故事，因為朱重八抗元本來就係從卒仔做起，到抗元軍個陣已經有相當龐大嘅部隊，根本就唔會有秘密起事呢一回事。
其實呢個故事就係嚟自晚清時期發行嘅偽書《燼餘錄》，內容係將原來歷史加鹽加醋，成為咗「八月十五殺韃子」呢個故仔。背後含意其實係想刺激晚清時間嘅老百姓，參與革命推翻外族滿清政權。而當時因為革命黨人相當落力去宣傳呢個故事，所以就成為家傳戶曉嘅故事，唔少人都當真係有呢回事。
原圖嚟自網絡