繼續同史友們介紹一啲經常都會喺影視作品見到服飾，有睇開清朝宮廷劇嘅史友應該都必定會見過圖中呢種花盆鞋。其實呢種鞋就咁睇嘅外型就已經知道唔會著得舒服，但點解偏偏成個後宮嘅妃嬪都視之為珍寶呢？阿史今次就同大家講一講啦！
呢種花盆鞋實際上就係一種高底鞋，根據底部嘅形狀其實仲會有「馬蹄鞋」、「元寶鞋」等等。高底鞋幾時起源就已經搵唔到明確時間，但就可以知道呢種鞋型係喺清朝中晚期先至盛行，咁到底當中有咩原因呢？
其實漢人「纏足」已經有好悠久嘅歷史，雖然早期清朝就已經下令唔准女性纏足，但呢種風氣就係屢禁不止，甚至仲影響埋原本冇呢種習慣嘅滿人。而為咗令到自己隻腳可以睇落細啲，「高底鞋」就喺呢種時期出現，令到「使小者愈小，瘦者愈瘦」、「足之大者，往往以此藏拙」。
雖然高底鞋著落真係會好唔舒服，但就由於呢種鞋可以令到女性睇落修長挺拔，舉止優雅，所以喺皇室貴族當中相當盛行，慢慢妃嬪仲會喺鞋上加上各種飾物，形成一種身份嘅象徵。
原圖嚟自網絡