隨着夢天實驗艙順利完成轉位，中國天宮太空站「T」字基本構型在軌組裝完成，見到中國航天科技發展到呢個地步都真係幾令人興奮。之前睇過央視紀錄片，中國成功發射第一枚人造衛星上太空，到今時今日太空站响太空運作，都只係五十年多啲嘅時間。
响1970年4月，中國第一枚人造衛星東方紅一號响長征一號火箭運載下成功進入太空預定軌道，令中國成為當時少數有能力將人造衛星送上太空嘅國家。睇返資料，原來早响上世紀五十年代，中央政府已經有發射人造衛星嘅構思，响1965年，人造衛星規劃方案獲得批准，計劃預訂响1970年至1971年發射人造衛星上太空。不過，响1968年嗰陣有關單位就曾被要求要力爭1968年國慶前將衛星發射升空。但因為真係趕唔切最終都係响1970年1月長征一號火箭完成組裝，經測試後同年3月出廠，响4月獲得周恩來總理批准，火箭進入最終發射陣地。而有關部門按當時天氣預測，預計4月24日適合進行發射，最終响毛澤東主席批准下，長征一號順利响當晚9時35分升空，9月50分東方紅一號進入預定軌道。今時今日睇返，當年國家能夠响1970年4月發射人造衛星，可以話係計劃之內，能夠事事順利完成都算係萬幸。
原圖嚟自網絡