喺唔少古裝劇集當中，一旦有大臣見到皇帝，都會統一咁向皇上講出「萬歲萬歲萬萬歲」嘅說話，但到底呢句說話又係點嚟？阿史今次就同大家講一講啦！
早喺西周時期《詩經》入面就有記載，當時嘅人每逢飲酒舉杯歡慶之時，都會用到「萬壽無疆」一詞進行祝頌，而呢個詞當時就只係民間使用，同皇帝並冇關係。而根據《漢書‧武帝紀》記載，喺漢武帝在位期間，佢就喺登山祭拜上天時，聽到山下民眾「在廟旁吏卒咸聞呼萬歲者三」，自此以後佢就相當鍾意呢個詞，並要求民眾一定要咁樣稱呼佢，於是「萬歲」一詞就成為皇帝專用。
之不過，要叫足「萬歲萬歲萬萬歲」成句說話就係去到武則天之時。佢喺稱帝之後就好想得到群臣肯定佢皇帝地位，於是有一次佢就召集翰林院眾學士，出題「玉女河邊敲叭梆，叭梆叭梆叭叭梆」，結果就有學士回答「金鑾殿前呼萬歲，萬歲萬歲萬萬歲」。呢個答法當然令到武則天相當滿意，並且仲令到「萬歲萬歲萬萬歲」一句流傳落嚟。
原圖嚟自網絡