早幾日就同史友們講到「中國傳統製茶技藝」就被列入聯合國教科文組織人類非物質文化遺產代表名錄，而同樣入選名錄嘅仲有一樣大家都意想不到嘅食物，就係「長法包」喇！到底呢種食品有咩特別之處，可以代表到一個國家呢？阿史今次就同大家講一講啦！
法國長棍麵包（Baguettes）嘅歷史其實可以追溯到法國大革命，由於當時法國社會相當之唔平等，甚至仲有強烈嘅等級制度。對當時嘅人嚟講，呢一點就可以喺麵包上體現到，精製嘅白麵包就只有貴族先可以食，而平民就只能夠食黑麵包，麵包喺呢個時期亦都成為唔同階級嘅象徵。直到1793年，法國先至立法規定只能夠製作一種「平等麵包」，成份就必需由四分三小麥與四分一黑麥製作而成。隨住後來拿破崙即位之後，平等麵包嘅製作工序就變得規範化。
咁點解法國長棍麵包又會選擇以長條形呈現呢？其中一個故事就係由於拿破崙時期經常都要打仗，為咗方便士兵攜帶軍糧，所以製作成呢種長條形就可以直接放入背包行軍喇！由於呢種麵包同法國歷史息息相關，所以歷年嚟法國都有多次立法規定製作方法，目的就係想好好保存呢種非遺。
原圖嚟自網絡