喺唔少古裝嘅清廷後宮劇當中，眼利嘅史友們可能都會發現到劇中嘅妃子身上都會掛住一個個好似石頭咁樣嘅「錠子」。呢啲「錠子」似係裝飾但又好似另有用途咁，咁到底呢啲「錠子」真身又係啲咩呢？阿史今次就同大家講一講啦！
其實呢啲所謂嘅「錠子」就係一種藥物，簡單嚟講就係古代嘅膠囊，通過將中藥磨成粉再添加一定嘅黏著劑而製成呢種規定嘅形狀。錠子藥嘅種類有好多，除咗可以用嚟避暑、除潮等，甚至仲可以用嚟解毒。要知道喺古代，由於醫療科技唔發達，所以就算普遍嘅天氣酷熱、蚊蟲叮咬都可以威脅人嘅生命，「錠子藥」喺呢啲時候就可以起到急救嘅作用。
清朝後宮對錠子藥就有好大需求，甚至清宮造辦處仲曾設置錠子藥作坊專門製藥。每年皇帝都會規定生產一定嘅量並賞賜畀後宮嬪妃及前朝大臣，造藥並唔難，但由於皇帝賞賜嘅錠子藥都有複雜嘅形狀以及圖案，所以製作時間同埋成本就喺晒呢度喇！
原圖嚟自網絡