年近歲晚，阿史有次行街果陣就見到有大型連鎖食肆推廣賀年「佛跳牆」，鮑嵾翅肚就係非常名貴，不過長期糧尾嘅阿史見到都只係得個恨字。
「佛跳牆」係福建名菜，用料上乘名貴，一直都被受食家們追捧。响民間傳說當中，話係一名御廚諗唔到有乜新菜色、面臨被斬頭前把心一橫，將鮑嵾翅肚放埋一齊煮成一煲，意外地發現非常好食，因而成為名菜。亦由於煲嘢太香，搞到隔壁修行多年嘅老和尚爬牆張望，因而有佛跳牆之名。
不過，今時今日大家食到嘅「佛跳牆」，就應該唔係最原始嘅「佛跳牆」。有食家研究最早有「佛跳牆」記載嘅文獻係清代飲食著作《筵款豐饈依樣調鼎新錄》，响「豕羊類」條目下就有記載1866年「佛跳牆」嘅原材料：大腸、肉、蘿肉，紅湯。估計當時福建人都係將啲普通食材煮成一煲，成為「佛跳牆」。至於「 佛跳牆 」幾時開始加入鮑嵾翅肚呢？就係七八十年代，據講作為華僑之鄉嘅福建，响改革開放初期就有好多回國探親嘅華僑，為咗招呼呢班有錢人，有酒店大廚就改良咗「佛跳牆」，加入名貴食材入去，就成為咗今時今日版本嘅「佛跳牆」喇！
題外話，每次講到佛跳牆，阿史都會諗起《食神》唐牛同史提芬周決戰時整「佛跳牆」呢一幕。
原圖：網絡、電影《食神》劇照