就喺今日，又有一則令人婉惜嘅消息傳出。據中央美術學院壁畫系嘅消息，中國著名藝術家、中國壁畫運動開拓者之一，有份參與國徽設計嘅周令釗先生於2023年1月3日15時06分安然離世，享年104歲。
出生喺1919年嘅周令釗被稱為係「新中國設計第一人」，喺1949年至1987年間，佢就曾經主筆創作過中華人民共和國開國大典天安門城樓毛主席畫像，參加中華人民共和國國徽、政協會徽、中國少年先鋒隊隊旗等設計，即使係中國共產主義青年團團旗、中國人民解放軍八一勳章、獨立自由勳章、解放勳章以至新中國成立後第二、三、四套人民幣票面整體美術設計都係由佢負責。
喺佢八十幾年嚟嘅創作生涯當中，仲有好多值得留意嘅作品，就好似中華人民共和國的第一張海報《復活》，為人民大會堂湖南廳設計嘅《韶山》湘繡畫屏。可以話，周令釗先生嘅一生，就係為新中國形象設計上作出歷史性貢獻。
原圖嚟自網絡