依家正值農曆新年，呢幾日阿史無無聊聊响手機睇咗啲片，見到有一個短視頻話現行農曆並唔係明末清初嘅湯若望所編，而係集合歷朝歷代嘅國人嘅心血之作。對於呢個講法，唔可以話錯，但又唔可以話啱。
咁即係點呢？其實自商代開始，中國人就開始應用曆法，而歷朝歷代朝廷都設有欽天監（或類似職位），其中一個任務就係計算曆法，因為中國自古以農立國，因此曆法計算可以話係非常重要。而响明末個陣，當時用嘅《大統曆》誤差愈來愈大，好似唔多準，所以主持修曆嘅禮部尚書徐光啟就搵咗傳教士湯若望協助編修《崇禎曆書》，由於呢部曆法融合咗西方天文學元素，所以曆代計算精密度比舊曆法高得多，不過原本主修呢部曆法嘅徐光啟就响完成前離世。後嚟滿清入關，湯若望修改咗《崇禎曆書》部分內容後就上書，希望朝廷用上新曆法，後嚟湯若望仲以一次準確計算日蝕嚟證明新曆法比《大統曆》、《回回曆》等精確，最後清廷唔單止响順治元年七月採用新曆法，湯若望仲被任命為欽天監監正，新曆法亦改名為
《時憲曆》。所以後世人就認為《時憲曆》係由湯若望所編，但似乎佢只係其中一位編修者。
至於今時今日所用嘅農曆，其實係由南京紫金山天文台曆算和天文參考系編訂，亦稱為《紫金曆》，同清代用嘅《時憲曆》有所唔同。
原圖嚟自網絡