喺唔少影視作品當中，每逢有弱小嘅平民受到欺壓，就會有路見不見嘅俠客出手幫忙，劫富濟貧，但歷史上嘅俠客又係咪真係會咁做呢？阿史今次就同大家講一講啦！
對於俠客嘅形象，大家都可能會理解成浪跡天涯、劫富濟貧嘅俠士，之不過喺歷史上符合呢種形象嘅人只能夠稱為「壯士」，而唔能夠稱為「俠客」。所謂嘅「俠客」最早就出現喺司馬遷《史記·遊俠列傳》嘅朱家、郭解，佢哋並唔係一窮二白，反而都係財主出身，並且手下有唔少被通緝嘅逃犯。
要喺古代成為俠客係需要一定嘅財富，無論係馬匹、劍等配備喺古代都係相當昂貴，所以古代做得俠客嘅人多數都係有錢人。而呢班俠客嘅武功亦都唔得高強，但就經常都被認為係以武力挑戰國家法規，對朝廷嚟講呢班遊手好閒又識啲武功嘅人就係一個社會問題，所以歷朝歷代都希望佢哋可以投軍，以解朝廷嘅心腹大患。
所以簡單嚟講，呢班有錢嘅俠客對當時社會嚟講就只係「俠以武犯禁」嘅存在，並未得到太大嘅認可，而劫富濟貧亦都只係傳說而已。
原圖嚟自網絡