早幾日就同史友們講到埃及嘅最新考古發現首次搵到完整嘅死者之書，話口未完關於木乃伊嘅考古研究又再次公布，原來要製成一具木乃伊並唔係一件容易嘅事，而係需要嚟自世界各地嘅材料，阿史今次就同大家講一講啦！
據美國《華盛頓郵報》指出，近日就有研究人員對一個具有2600年歷史嘅古埃及地下防腐工作坊遺址進行研究。呢個遺址位於埃及首都開羅以南，著名薩卡拉金字塔群附近，早喺2016年考古學家就喺遺址內出土逾一百件容器，部分容器更加附有標籤說明所載原料，甚至仲有講明喺製作木乃伊過程中原料嘅使用方法。
喺呢項研究當中，其中一個有趣嘅地方係，研究人員認為單靠古埃及本土，未必咁容易可以製作到木乃伊。喺眾多原料當中，考古團隊就搵到柏油、脂肪、樹脂和油等成分，其中就有一種嚟自死海嘅天然瀝青、嚟自地中海嘅杜松、柏樹副產品以及嚟自非洲嘅欖香樹樹脂，甚至仲有其他東南亞嘅原材料。
經過呢項重大發現，考古團隊就認為古埃及人為咗製作木乃伊係經過相當嚴謹漫長嘅過程，仲對微生物學有所認識，成個過程仲同全球化供應鏈息息相關！
原圖嚟自網絡