之前講咗一啲柬埔寨唐人街嘅故事，有史友就留言俾阿史，問最早嘅唐人街係幾時出現，史友問到自然要搵搵資料。
對於唐人街响幾時出現，一直以來都有唔同講法，其中一個原因就係唐人街無一個絕對定義，有啲人覺得係有呢個名先係，有啲人覺得海外華人聚居之地就可以當係。姑勿論點，唐人街呢個講法，最早見於王詠霓响1887年寫嘅《歸國日記》：「金山為太平洋貿易總彙之區，華人來此者六七萬人，租屋設肆，洋人呼為唐人街。」不過咁，有唐人街呢個叫法就唔代表個陣先有華人聚居之地出現，因响1875年，張德彝在《歐美環遊記》中就稱當地華人聚居社區為「唐人城」，由於英文叫China Town，所以佢又叫唐人城做中國城。
不過，記錄海外華人聚居之地最早嘅，就應該係明代時由李百恭、郝杰编撰嘅《日本考》，當中就有咁嘅記載：「（箱崎）有一街名大唐街, 而有唐人留戀於彼, 生男育女者有之, 昔雖唐人, 今為倭也。」而响清初時，政治家兼學者納蘭性德响1673年所著嘅《淥水亭雜識》都有「大唐街」相關記載：「日本，唐時始有人往彼，而居留者谓之『大唐街』，今且長十里矣。」而大唐街呢個地方，就應該可視為最原始嘅唐人街。