【講開有段故】古代同姓不婚但表親點解可以結婚？
相信唔少史友都知道古代中國就一直有規定「同姓不婚」嘅原則，但與此同時表親之間又係可以結婚。咁喺因為擔心近親通婚生下畸胎而決定「同姓不婚」嘅前提下，點解表親之間又可以結婚呢？阿史今次就同大家講一講啦！
要解釋呢件事，就要先從「同姓不婚」講起。「同姓不婚」嘅制度最早就係出現於西周，喺周朝之前其實近親通婚並唔係一件被禁止嘅事，而先民亦都未必懂得優生學，所以最早嘅時候「同姓通婚」係經常發生喺同一個部落、氏族當中，直到後來大家意識到「同姓通婚」可能會對後代造成智商或生理上嘅先天缺陷，所以就有後來《北史》中北魏孝文帝關於婚配嘅論斷「周世始絕同姓之娶」。而喺《左傳》當中亦都有指「男女同姓，其生不蕃」以及《國語》「娶妻避其同姓，畏天災也」都有類似嘅講法。
咁問題嚟喇，既然同姓同宗婚配會被列為禁忌，咁點解表親婚配就冇事呢？其實古代嘅婚姻講嘅並唔係愛情，而係將國家以及家族利益相互連繫埋一齊，令到兩者之間嘅利益最大化。所以，同姓不婚既然唔得，就只可以留返「表親通婚」呢個方法嚟親上加親，對後代嘅影響亦都相對冇咁大。
原圖嚟自網絡