中國國民黨前主席馬英九今日就繼續喺南京，而嚟得呢個有民族歷史傷痕嘅城市，佢哋一行人亦都去咗侵華日軍南京大屠殺遇難同胞紀念館參觀，並且進行深切悼念。
喺今日早上，馬英九一行人就抵達侵華日軍南京大屠殺遇難同胞紀念館，並且來到「古城的災難」大型雕塑前，手持鮮花集體肅立以表悼念。喺1937年12月13日，日軍攻佔南京後，製造南京大屠殺慘案，死於慘案人數多達30萬，所以「300000」嘅大字，就係紀念館嘅一個重要標誌。南京大屠殺遇難同胞紀念館位於南京城西南江東門，正正就係當年日軍大屠殺嘅一個主要地點以及遇難者叢葬地。紀念館於1985年落成開放，經過1995年、2005年兩次擴建，先至有今日嘅規劃。
展覽陳列包括廣場陳列、遺骨陳列和史料陳列三部份，而馬英九一行人就走入展廳，了解南京淪陷前形勢、日軍進犯南京與南京保衛戰、日軍在南京暴行等等，一路都係神情凝重。而喺佢哋參觀完展覽之後，馬英九就表示，「關於南京大屠殺歷史的書籍、照片，我看了一些，但從來沒有一次像今天受到這麼大的衝擊。因為這是人類歷史上罕見的野獸般行為，中國人是最大受害者。」他亦都希望今次同行嘅學生明白，身為中國人，不管在海峽哪一邊都應自立自強，面對外來欺淩要勇敢抵抗，呢啲正係佢哋喺台灣了解得唔夠嘅事物，正可以通過呢次機會作為自身往後發展嘅參考。
原圖嚟自網絡