繼續同史友們介紹一啲清朝嘅歷史趣聞，相信史友們都知道，由努爾哈赤建立後金，到皇太極改國號為清，一直到宣統溥儀，清朝就一共誕生咗12位皇帝，但唔知大家又知唔知專門供奉帝王牌位嘅「壽皇堂」就只係得10個牌位？到底當中發生咗咩事，阿史今次就同大家講一講啦！
清朝12位皇帝分別就係努爾哈赤、皇太極、順治帝、康熙帝、雍正帝、乾隆帝、嘉慶帝、道光帝、咸豐帝、同治帝、光緒帝以及溥儀。數到呢度，心水清嘅史友都應該知道，溥儀作為清朝最後一位皇帝，同時亦都係亡國者，佢嘅牌位自然就唔會被供奉喺「壽皇堂」當中，咁到底11位皇帝當中，仲少咗邊個皇帝嘅牌位呢？答案就係乾隆帝喇！
乾隆帝嘅牌位原本一直都安置喺太廟當中，但就喺1914年有位乾隆年間御用天文官戴進賢嘅後人德國古董商戴賽爾搵到太廟管事太監，並表示希望以高價買到清乾隆太廟牌位。而喺佢成功得手之後就好快返到德國，仲將乾隆帝嘅牌位同佢祖上遺像放埋一齊，每逢萬聖節加以祭拜。喺戴賽爾死後，後人唔知道牌位嘅價值而放埋一邊，最後經過有心人轉折之下先至搵返，最後乾隆帝嘅牌位就以400萬元人民幣嘅拍賣價錢喺2005年回歸中國。
原圖嚟自網絡