歷朝歷代嘅帝皇陵墓都因為陪葬品豐厚而成為唔少盜墓賊嘅目標，而位於陝西關中地區嘅唐十八陵就埋葬咗唐朝19位皇帝，陪葬品自然可以令到盜墓賊享盡榮華富貴。因為帝皇陵墓嘅名氣，唐十八陵有十七個陵都已經被盜，但唯獨係乾陵即使被發現位置都冇人能盜，到底當中有咩原因呢？
乾陵係唐高宗李治以及皇后武則天合葬墓，所在嘅位置就係梁山上。雖然就咁聽落呢個陵墓位置好似相當明顯，但實情係就算喺唐朝末年黃巢之亂，黃巢帶領40萬名農民士兵嘗試來到盜墓，足足掘咗2、3個月掘出一條40公尺深大溝都無法發現墓道口。除此之外，南宋學者程大昌《考古編》就提到五代時期嘅盜墓賊溫韜亦曾經想搵到唐朝所有陵墓，但就「獨乾陵不可近」。
咁到底點解唐十八陵中只有乾陵未被盜掘?據後世學者研究指出，乾陵墓室都係由巨大且堅硬嘅石灰岩組建，交接嘅位置甚至仲有鐵栓固定，石塊之間嘅空隙更加用到錫去填滿，就算想盜都無從入手。而且，乾陵所在位置直頭就係半山腰，要盜墓就先要打破成座山嘅保護先有可能，再加上墓道口相當隠蔽，種種原因都令乾陵成為唐十八陵中唯一未被盜掘嘅陵墓。
原圖嚟自網絡