早排就同史友們介紹咗「飛將軍」李廣到底有幾強大，今次就同史友們講一講號稱係清朝最強戰力嘅海蘭察，到底點樣一步一步由牽馬出身再憑武藝成為清朝主將。
海蘭察既唔係名門出身，亦都唔係滿族人，自小係孤兒嘅佢出生喺1739年嘅呼倫貝爾，因為身世悲慘所以就練就咗一身騎射本領。而喺乾隆二十年，準噶爾爆發內鬨，海蘭察被強行徵召入伍，當時冇任何背景嘅佢就只能夠成為軍隊當中負責牽馬嘅奴僕。戰事進行咗幾年，準噶爾大敗而佢哋嘅大將巴雅爾企圖帶住殘兵逃走，最終就被19歲嘅海蘭察射中生擒。
因為呢一個功績，海蘭察就被乾隆升為正五品三等御前侍衛，並賜額爾克巴圖魯稱號以及功臣圖像。自此之後，海蘭察就喺乾隆身邊過上咗安穩嘅十年，並且官職接連升咗六級成為正二品一等侍衛及滿洲鑲黃旗人。海蘭察嘅功績並未就咁停止，佢先喺清緬戰爭取得兩次勝利，又喺木果木之戰當中改變殘局，帶住殘兵與前南路軍主帥阿桂會合，喺金川之戰取得勝利。接連嘅勝利亦都令海蘭察成為正一品領侍衛內大臣、一等超勇公等官職。
多年嚟征戰沙場，海蘭察積勞成疾並喺55歲之時離世。得知消息後嘅乾隆就為佢打破慣例，將佢牌位放入供奉戰死沙場武將嘅昭忠祠，並親自寫上500字祭祀碑文，真係有情有義。
原圖嚟自網絡